पोखरा महानगरपालिकाको वडा ५ र ८ जोड्ने फिर्केखोलाको पुल भासिएको छ । अविरल वर्षाका कारण पोखराको पस्र्याङ र बगालेटोल जोड्ने प्रमुख पुल भासिदा सवारीसाधन आवागमनमा समस्या भएको छ ।
भासिएको पुलमा चारपाङ्ग्रे सवारी बन्द गरिएको छ भने सो स्थानको फिर्केखोलामा तत्काल जाली हालेर थप क्षति हुनबाट रोक्ने प्रयास गरिएको छ । एडिबीका १५ वटा दिगो पर्यटन विकासका योजनामध्ये फिर्केखोला पनि महत्त्वपूर्ण योजना हो । फिर्के कोरिडोरको लम्बाई ८ किमी रहेको छ भने यस खोलासँग पोखरा महानगरकाको वडा २, ४, ५ , ६, ७, ८, ६ र १७ जोडिएको छ ।
फिर्केखोलाको संरक्षणका निम्ति महानगर, वडा, सम्बन्धित निकायलगायतले चासो दिनेगरेको देखिए पनि यसको भौतिक प्रगति न्यून छ । खोलाको संरक्षणस्वरुप झाडी फाड्नेजस्ता काम सरोकारवालाले गरे तापनि संरक्षणको ठोस पहल भएको छैन । खोलामा वरपरका २० घरबस्तीले सोझै ढल मिसाएको अनुगमनमा देखिएको छ भने सयौँ घरहरूले फिर्केको मापदण्ड मिचेर संरचना निर्माण गरेका छन् । तर मापदण्ड विपरीतका संरचना भत्काउन महानगरलाई चुनौती थपिएको छ ।
निजी तवरबाट बनाइएका घरमात्र नभई आमा समूहको भवन, समाज घर, व्यापारिक भवन, विद्यालय भवनलगायतले मापदण्ड मिचेर संरचना बनाएका छन् । हालको फिर्केखोलाको मापदण्ड दाँयाबाँया १०–१० मिटरको कायम गर्नुपर्ने भनेकोमा कार्यान्वयन भएको छैन । महानगरले सो मापदण्ड घटाएर ५–५ मी. को प्रस्ताव अघि सारेको पोखरा महानगरपालिका वडा ५ का वडाध्यक्ष विष्णुप्रसाद बरालले बताए ।
