पोखरामा तीज सांस्कृतिक महोत्सव

पोखरामा सोमबारबाट तीज सांस्कृतिक महोत्सव २०८० सुरु भएको छ । पर्यटन विकास महिला संघ (टेवान)ले पोखरा –६ लेकसाइड स्थित कोमागाने पार्कमा आयोजना गरेको महोत्सवको सोमबार नेपाल सरकारका कानुन, न्याय तथा संसदीय मामिला मन्त्री धनराज गुरुङले उदघाटन गरे ।
कायक्रममा उनले महिला मुलुक हाक्न सक्ने शक्ति भएको बताए । “महिला पुरुषको वैशाखी हैनन्, मुलुक हाक्ने मेरुदण्ड हुन्”, मन्त्री गुरुङले भने, “महिला दिदीबहिनीहरु अब चुलोचौकोमा मात्र सीमित छैनन् ।” उनले तीज परम्परागत पर्व भएकाले बढी खर्चिलो र भड्किलो बनाउन नहुनेमा जोड दिए ।
महोत्सवको उदघाटन गर्दै मन्त्री गुरुङले पछिल्लो समय तीज मनाउने तरिका बद्लिएको उल्लेख गर्दै आयोजक टेवानको प्रयत्न राम्रो भएको बताए ।
तीजमा देखिएका विकृति सुधार हुनुपर्ने बताउदै उनले चाडबाडलाई उत्पादनसँग जोडेर मनाउदा प्रभावकारी हुने र त्यसले समग्र देशको विकासमा टेवा पुग्ने धारणा व्यक्त गरेका छन् ।
पोखरा पर्यटन परिषद्का महासचिव सञ्जयकान्त सिग्देलले महोत्सवले पोखराको पर्यटन बजारलाई चलायमान बनाउने धारणा राखे । उनले पोखराको पर्यटन विकासका लागि यथाशीघ्र अन्तर्राष्ट्रिय विमानस्थलबाट अन्तरदेशीय उडान सुरु गर्नुपर्ने बताए । नेपाल पत्रकार महासङ्घ, कास्कीका अध्यक्ष विमला गुरुङले तीज पर्वले महिलाबीचको एकतालाई सुदृढ गर्नुपर्ने उल्लेख गरिन् ।
महोत्सव सोमबार २५ गते देखि २७ गतेसम्म कोमागाने पार्कमा  संचालन हुनेछ ।   महोत्सवलाई सफल पार्न पोखरा महानगरपालिका, पोखरा पर्यटन परिषद लगायत पर्यटन सम्बद्ध संघ संस्थाहरुको सहयोग रहेको टेवानकी अध्यक्ष कमला गिरीले जानकारी दिइन  ।