मुस्ताङको घरपझोङ गाउँपालिका—२ मार्फामा रहेको शीतोष्ण बागवानी विकास केन्द्रले ५७ औँ स्थापना दिवस मनाएको छ ।
शीतोष्ण हावापानीमा उत्पादन हुने र उत्पादन गर्न सकिने तरकारी तथा फलफुलको अध्ययन तथा अनुसन्धान गर्ने शीतोष्ण बागवानी विकास केन्द्र स्थापना भएको ५७ वर्ष पुगेको हो ।
देशको शीतोष्ण हावापानी हुने क्षेत्रको कृषि अनुसन्धान, विकास तथा प्रवर्धन गर्ने उद्देश्यले २०२३ सालमा स्थापना भएको शीतोष्ण बागवानी विकास केन्द्रले तरकारी तथा फलफूलको अध्ययन अनुसन्धान गर्दैआएको छ । शीतोष्ण बागवानी विकास केन्द्रकै माध्यमबाट मुस्ताङमा शीतोष्ण हावापानीमा उत्पादन हुने फलफुल तथा तरकारी र विभिन्न बालीको संरक्षण, विकास र अनुसन्धानमा महत्वपूर्ण योगदान रहेको स्थानीय कृषकको भनाइ रहेको छ ।
शीतोष्ण बागवानी विकास केन्द्र मार्फाको स्थापना दिवसको अवसरमा जिल्ला न्यायाधीश ईश्वर पराजुलीले किसानलाई आधुनिक र वैज्ञानिक खेती गर्न केन्द्रले ठूलो सहयोग गरेको र आगामी दिनमा पनि केन्द्रले हावापानी सुहाउँदो कृषि कर्म गर्न सिकाउने अपेक्षा राखेको बताए ।
जिल्ला समन्वय समिति मुस्ताङका उपप्रमुख आइतलाल थकालीले जिल्लाका कृषकलाई आफ्नो उत्पादन बढाउन र बजारिकरण गर्न पनि सकिन्छ भन्ने सिकाउने काम केन्द्रले गरेको बताए ।
कार्यक्रममा घरपझोङ गाउँपालिका अध्यक्ष मोहनसिंह लालचनले जिल्ला मात्रै नभएर अन्यत्रका पनि कृषकहरुका लागि केन्द्रले दिएको योगदान अतुलनीय रहेको बताएका छन् । शीतोष्ण बागवानी विकासले स्याउ लगायतका फलफुल तथा तरकारीको प्रशोधन गरी ब्रान्डी, साइडर, वाईन र जुसहरु उत्पादन गर्दछ ।
