दोस्रो पञ्चवर्षीय योजनाको अवधारणापत्रको मस्यौदा सम्बन्धमा निजी क्षेत्रका सरोकारवालाहरुसँग अन्तरक्रिया तथा संवाद भएको छ ।
शहरी योजना आयोग र सार्वजनिक निजी संवाद मञ्चद्वारा आयोजित कार्यक्रमलाई पोखरा महानगरपालिका, अकाउन्टेबिलिटि ल्याब नेपाल र व्यवसायिक प्रवद्र्वन केन्द्रले सहयोग गरेका हुन् ।
कार्यक्रमको संचालन व्यवसायिक प्रवद्र्वन केन्द्रका प्रमुख नवराज अधिकारीले गरे । दोस्रो पञ्चवर्षीय योजनाको अवधारणापत्रको प्रारम्भिक मस्यौदा शहरी योजना आयोगका सदस्य होमनाथ गैरेले प्रस्तुत गरे ।
गण्डकी प्रदेश उद्योग परिषद्का सदस्य गणेश बहादुर थापाले योजनाको घोषणापत्र सबैले बुझ्ने सरल भाषामा लेखिनुपर्ने बताए । लेखनाथ उद्योग वाणिज्य संघकी जेनेरल सचिव जानुका पराजुलीले श्रम, सीप उपयोग गरी व्यवसायीकरण गर्न सकिने नीति निमार्ण गर्न आवश्यक रहेको बताइन् । शहरी गरिबी न्युनिकरण गर्न सरकारले व्यवसायीमैत्री वातावरण बनाउनुपर्नेमा जोड दिइन् ।
नेपाल अन्तराष्ट्रिय फोरमका अध्यक्ष प्रा. डा. विकास के.सीले शैक्षिक क्षेत्रमा बेथिति फैलिइरहेकाले विद्यालयहरुको अनुगमन गर्नुपर्ने बताए ।
नेपाल युवा उद्यमी मञ्चका सदस्य अशोक खड्काले ‘बुक फ्रि फ्राइडे’को अवधारणा पोखरामा पनि सुरु गर्नुपर्ने तर्क राखे । युवालाई उद्यमी बनाउन विद्यालयस्तरबाटै विद्यार्थीलाई तालिम दिन सुरु गर्नुपर्ने बताए । पोखरा पर्यटकीय नगर भएकाले प्राकृतिक सुन्दरतालाई हानि नपुग्नेगरि भवन मापदण्ड बनाउन पर्यटन विज्ञ डा. रामजी शर्माले बताए ।
सहभागी युवा दीपा भण्डारीले स्वास्थ्य क्षेत्र तथा यातायात सेवाहरु प्रविधिमैत्री बनाउनुपर्ने धारणा राखिन् । गण्डकी विश्वविद्यालयका डीन कपिल अधिकारीले पोखरालाई बच्चामैत्री शहरको रुपमा स्थापित गराउनुपर्ने बताए । अनुसन्धानको विधामा सर्भे, डाटा कलेक्शन गर्नुपरेमा यस्ता कामको जिम्मेवारी विश्वविद्यालयलाई दिनु उपयुक्त हुने बताए । शहरी योजना आयोगका उपाध्यक्ष र सार्वजनिक निजी संवाद मञ्चका संयोजक प्रेमलाल लामिछानेले सम्पुर्ण सुझावहरुलाई मनन गरी विकास योजनालाई अगाडि बढाउने वाचा गरे ।
