पोखरामा आइतबारदेखि पहिलो विकास शिल्ड राष्ट्रिय ह्विलचियर बास्केटबल च्याम्पियनसिप हुने भएको छ । आयोजक सुन्दर ढोका साथीले शनिबार पोखरामा पत्रकार सम्मेलन गर्दै अपांगता भएका व्यक्तिहरुलाई खेलकुदमा प्रोत्साहन तथा विकास र प्रवद्र्धन गर्ने मुख्य उदेश्यले प्रतियोगिता आयोजना गर्न लागेको जानकारी दिएको हो ।
पोखरा रंगशाला र रामघाट पुन समाजको कबर्डहलमा २ दिनसम्म चल्ने प्रतियोगितामा १५ टोली सहभागी हुने प्रतियोगिता व्यवस्थापक हिमाल अर्यालले जानकारी दिए । उनका अनुसार प्रतियोगितामा विभागीय टोली नेपाल आर्मी, एपीएफसहित ७ प्रदेशबाट पुरुष ९ टिम, महिला टिम ६ समूहले प्रतिस्पर्धा गर्नेछन् । प्रतियोगिताको विजेता हुने महिला तथा पुरुष ६ समूहबाट प्रथम हुने टोलीले ५०, हजार दोस्रो हुनेले ४० हजार र तेस्रो हुने टोलीले ३० हजार रुपैयाँ तथा सान्त्वना पुरस्कार ५ हजार रुपैयाँ पुरस्कार प्राप्त गर्ने आयोजकले जानकारी दिएको छ । संस्थाका संस्थापक कार्यकारी निर्देशक स्वर्गीय विकास अधिकारीको दोस्रो वार्षिक स्मृतिमा प्रतियोगिता आयोजना गरिएको संस्थाले जनाएको छ ।
