युक्रेनले रुसी सेनामा भर्ती भएका नेपालीसहित ८ युद्धबन्दी सार्वजनिक गरेको छ । समाचार संस्था रोयटर्सका अनुसार थुनामा रहेका युद्धबन्दीमध्ये शुक्रबार ५ नेपाली क्युबा, सोमालिया र सियरा लियोनका एक÷एक गरी ८ जनालाई सार्वजनिक गरेको हो । उनीहरूलाई सार्वजनिक गर्दै युक्रेनी सेनाले रूसी सेनामा भर्ती हुनबाट आफ्ना नागरिकहरूलाई रोक्न आग्रह गरेको छ । पत्रकार सम्मेलनमा युद्धबन्दीहरूलाई वर्दीमा उपस्थित गराइएको थियो । त्यहाँ दुई पङ्क्तिमा उनीहरुलाई राखिएको रोयटर्सले उल्लेख गरेको छ । यात्सेन्कोले उनीहरूलाई पनि अन्य युद्धबन्दीहरूलाई जस्तै व्यवहार गरिएको पनि बताए परराष्ट्र मन्त्रालयका प्रवक्ता अमृत बहादुर राईले सार्वजनिक गरिएको भनिएकाहरू थप नयाँ व्यक्तिहरू नभएको बताएका छन् ।
रूसी सेनामा भर्ती भएका ६ जना नेपाली युवकहरूलाई युक्रेनले बन्दी बनाएको उनले बताए । राजापुर नगरपालिका–१ बर्दियाका विवेक खत्री, मण्डनदेउपुर नगरपालिका–६ काभ्रेका सिद्धार्थ ढकाल, लेटाङ–२ मोरङका विकास राई, दाङका प्रतिक पुन, खैरहनी चितवनका सुजन सुवेदी र गोरखाका ईश्वर लामिछानेलाई युक्रेनमा बन्दी बनाइएका हुन् । उनीहरुलाई युक्रेनको नियन्त्रणबाट मुक्त गरी स्वदेश ल्याउने प्रक्रिया भइरहेको प्रवक्ता राईले जानकारी दिए । नेपालको दूतावास पनि नभएकाले अन्तर्राष्ट्रिय रेडक्रस सोसाइटी र जर्मनीस्थित नेपाली दूतावासबाट पहल भइरहेको उनको भनाइ छ ।
