गण्डकी प्रदेशका प्रदेश प्रमुख डिल्लीराज भट्टले नयाँ सरकार गठनका लागि आह्वान गरेका छन् । बुधबार बिहान मुख्यमन्त्री सुरेन्द्रराज पाण्डेले राजीनामा दिएपछि प्रदेश प्रमुख भट्टले दिउँसो संविधानको धारा १६८ को उपधारा २ बमोजिम सरकार गठनका लागि आह्वान गरेका हुन् । प्रदेश प्रमुखको अनुसार चैत २७ गते दिउँसो ३ बजेभित्र मुख्यमन्त्री पदमा नियुक्त हुन दाबी पेश गर्नुपर्नेछ । धारा २ मा दुई वा दुई बढी दलले बहुमतको सरकार बनाउने प्रावधान छ ।
गण्डकी प्रदेशका मुख्यमन्त्री सुरेन्द्रराज पाण्डेले विश्वासको मत जुटाउन नसकेपछि राजीनामा दिएका थिए। ६० सदस्यीय प्रदेश सभामा सरकार गठनका लागि ३१ संसदको समर्थन चाहिन्छ । गण्डकी प्रदेशमा कांग्रेसका २७ जना सांसद छन् । गण्डकीमा सत्ता गठबन्धनमा एमालेको २२ र माओवादी केन्द्रको सभामुखसमेत ८ सिट छ । यहाँ सरकार गठनका लागि २ सिट भएको राप्रपा निर्णायक मानिएको छ ।
उपधारा २ अनुसार सरकार बन्न सकेन भने प्रदेश प्रमुखले धारा ३ अनुसार सरकार गठनको लागि आह्वान गर्नेछन्। उपधारा ३ मा प्रदेश सभाको सबैभन्दा ठूलो दलको संसदीय दलको नेता मुख्यमन्त्री बन्ने प्रावधान छ । यही प्रावधानअनुसार पाण्डे पुनः मुख्यमन्त्री नियुक्त हुनेछन् । मुख्यमन्त्री नियुक्त भएको ३० दिनभित्र उनले विश्वासको मत लिनुपर्नेछ ।
