नवलपुरमा पछिल्लो ४ महिनामा मात्रै तिनवटा वयस्क पाटे बाघको मृत भेटिएका छन् । यी घटनाले निकुञ्ज बाहिरका बाघ असुरक्षित रहेको सन्देश प्रवाह भएको छ । चितवन राष्ट्रिय निकुञ्ज र मध्यवर्ती क्षेत्रसँग जोडिएका नवलपुरका राष्ट्रिय तथा सामुदायिक वनमा पाटेबाघको गतिविधि बढेपनि संरक्षणमा सम्बन्धित निकायको ध्यान पुग्न सकेको छैन । विनयी खोला किनारमा बुधबार साँझ पोथी पाटे बाघ मृत अवस्थामा फेला प¥यो । मृत फेला पर्नु ४÷५ दिन पहिलेदेखि त्यस क्षेत्रमा बाघको गतिविधी बढिरहेको थियो ।
बाघको गतिविधि शंकास्पद लागेपछि स्थानीयले वन कार्यालयलाई खबर गरे । वनका कर्मचारी पुग्दा बाघ छटपटाइरहेको थियो । बेलामै उद्धार गरेर उपचार गरेको भए बचाउन सकिने स्थानीयको आशंका छ । तर, वनका कर्मचारी पुग्दा बाघ छट्पटाइरहे ढल्यो । नलवपुरमा पाटे बाघ मृत फेला परेको यो पहिलो घटना होइन । पछिल्लो ४ महिनामा योसँगै ३ वटा पाटे बाघ मृत फेला परेका छन् । विनयी त्रिवेणी क्षेत्रमा नै यसअघि एउटा भाले पाटे बाघ बँदेललाई थाप्न राखेको पासोमा परेर मरेपछि गाडेर राखेको अवस्थामा फेला परेको थियो ।
बुधबार मृत फेला परेको करिब १० बर्षको पोथी पाटे बाघ सिकारीको आक्रमणबाट नभइ भाले बाघ वा अन्य कुनै जंगली जनवारको आक्रमणबाट घाइते भएर निधन भएको आँकलन गरिएको छ । भाले बाघ बयस्क भईसकेपछि आफ्नो क्षेत्र बनाउने गर्दछ । नयाँ क्षेत्र राज्ने क्रममा निकुञ्ज बाहिरका वन र वस्तीसम्म पुग्ने गरेको जानकारहरु बताउँछन् । चितवन राष्ट्रिय निकुञ्ज र मध्यवर्ती क्षेत्रभित्र बाघको लागि पर्याप्त आहार भएपनि नयाँ बयस्क बाघ र बुढा भएका बाघ वस्ती नजिकका जंगलमा नयाँ बासस्थान खोज्न डुल्छन् । नवलपुरका राष्ट्रिय तथा सामुदायिक वनमा १० देखि १२ वटासम्म पाटे बाघ रहेको अनुमान गरिएको छ । सहअस्तित्व कायम हुने क्रममा मानव र बन्यजन्तुबिचको द्वन्द बढिरहेको छ ।
