स्याङजामा पहिरोले घर पुर्दा आमा छोरीको मृत्यु भएको छ । फेदीखोला गाउँपालिका–५ बाँगेकी ३१ वर्षीय दुर्गा जिटी र ३ वर्षीय छोरी निकिसा जिटीको मृत्यु भएको हो । गएराती साढे ११ बजे घरमाथिबाट खसेको पहिरोमा परेर दुवैको घटनास्थलमै मृत्यु भएको जिल्ला प्रहरी कार्यालय स्याङजाका डिएसपी इन्द्रबहादुर रानाले जानकारी दिए । पहिरोले घरसँगै गोठ पनि पूर्ण रुपमा क्षति भएको छ । गोठमा रहेको भैसीसमेत मरेको छ । यसैबिच, बागलुङको पहिरोले घर पुरिएर वेपत्ता प्रेम विकको पनि शव फेला परेको छ ।
पहिरोमा वेपत्ता भएका गलकोट नगरपालिका–८ काँडेबाँसका बिसौनीका ५५ वर्षीय पुनको शव फेला परेको जिल्ला प्रहरी कार्यालय बागलुङले जनाएको छ । यसअघि पहिरोमा पुरिएको अवस्थामा प्रेमकी श्रीमती ५० वर्षीया वसन्ती विकको शव फेला परेको थियो । प्रहरीले पहिरोले पुरिएका श्रीमान श्रीमतीको उद्दार तथा खोजी गरेर शव निकालेको जिल्ला प्रहरी कार्यालय बागलुङका सूचना अधिकारी एवं प्रहरी नायब उपरीक्षक विजय यादवले जानकारी दिए । पहिरोले घर पुरिँदा प्रेमकी बुहारी कुमारी र नाति शिविर घाइते भएका छन् । घाइतेलाई उद्धार गरी अस्पताल पठाइएको छ ।गए रातिको भारी वर्षाका कारण घरमाथीबाट खसेको पहिरोले घर पुरेको थियो ।
त्यस्तै, गुल्मीमा पनि पहिरोले घर पुरिंदा पाँच जनाको मृत्यु भएको छ । मालिका गाउँपालिका–६ कडेलपाटामा भेषबहादुर कामीको घर पहिरोले पुर्दा एकै परिवारका ५ जनाको मृत्यु भएको जिल्ला प्रहरी कार्यालय गुल्मीका प्रहरी निरीक्षक सूर्यभान चौधरीले बताए । पहिरोमा पुरिएर ५५ वर्षीय भेषबहादुर, ४८ वर्षीया श्रीमती सुन्तली कामी, बुहारी २६ वर्षकी सीता बिक, नातिनीहरू ८ वर्षकी सपना बिक र ८ महिनाको बिपना बिकको मृत्यु भएको प्रहरीले जनाएको छ । पहिरोले भेषबहादुरको ढुंगामाटोले बनेको दुई तले घर पुरेको थियो । घर पहिरोले पुिरएको बिहान ७ बजे मात्रै जानकारी भएको प्रहरीले जनाएको छ ।
