पोखरा, २८ मंसिर ।
नेपाली कांग्रेस प्रतिनिधि सभा क्षेत्रीय कार्यसमिति क्षेत्र नं १ कास्कीले नेका कास्कीका सभापति किशोरदत्त वरालको अवैध र मनोमानि कार्यको खेद व्यक्त गरेको छ । समितिले सोहि विषयमा सन्दर्भमा नेका गण्डकीका सभापति शुक्रराज शर्माको ध्याकर्ष गराएको छ । मंसिर २१ गतेदेखि निरन्तर उम्मेदवार छनौटका लागि भेला र छलफल जारी रहेको बेलामा वरालले मनोमानि तवरले माथिल्लो निकायमा नामावली पेश गरेको भन्दै त्यसको खेद व्यक्त गरेको सभापति राजेन्द्रमणी लामिछानेले जारी गरेको प्रेस नोटमा लेखिएको छ । आईतबार मंसिर २८ गते पनि उम्मेदवार र क्षेत्रीय कार्य समितिबीच छलफल चलिरहेको अवस्थामा वरालले कास्की क्षेत्र नं १ को उम्मेदवारको नामावली पेश गरेको बुझिएको छ ।
क्षेत्र नं १ ले नाम सिफारिस नगरिकन वरालद्वारा माथिल्लो निकायमा मनोमानि तरिकाले नामावली पेश गरेकोले नेकाको विधानले समितिलाई नै नाम संकलन र सिफारिस गर्ने अधिकार भएको हुँदा जिल्ला सभापतिको सिरफारिस अवैध भएको उल्लेख गरेको छ । सभापति लामिछानेले लेखेका छन्, केन्द्रको पछिल्लो स्पष्ट परिपत्रले उम्मेदवार छनौट संख्यामा सहमति, सहकार्य गरेर निष्कर्ष निकाल्ने वातावरण बनाउन छलफल चलिरहेको छ । यसरी छलफल चलिरहेको बेलामा अकस्मात जिल्ला सभापति वरालको क्रियाकलापले पार्टीलाई अपुरणीय क्षेती र तमाम कार्यकर्ताको मनोबल गिरेको जनाईएको छ ।
लामिछानेले यस्ता गतिविधि र व्यक्तिगत लहडमा नलाग्न अनुरोध गरेका छन् । उनले क्षेत्रले सिफारिसका लागि संकलन गरेको नामावली उल्लेख गरेका छन् भने अन्य प्रक्रिया बाँकी रहेको जनाएका छन् ।
लामिछानेले आईतबार नै नेका गण्डकी प्रदेशका सभापति शुक्रराज शर्मालाई ध्यनाकर्षण पत्र लेख्दै नेका कास्कीका सभापति वरालको मनोमानि क्रियाकलापले पार्टीलाई अपुरणीय क्षेती हुने बताएका छन् ।
