पोखरा फेवातालमा शुक्रबारदेखि सुरु भएको पहिलो नेपाल–चीनमैत्रीपूर्ण ‘ड्रागन बोट रेस’ फेस्टिवल सम्पन्न भएको छ ।
नेपाल पर्यटन बोर्ड, नेपालस्थित चिनियाँ राजदूतावास र पोखरा महानगरपालिकाको सहआयोजनामा ‘ड्रागन बोट रेस फेस्टिवल सम्पन्न भएको हो । शनिबार भएको २ सय र ५ सय मिटर दुवैतर्फको फाइनल खेलमा चीनको सिचुवान ड्रागन बोट टिमले उपाधि हात पारेको छ । प्रतियोगितामा पहिलो भएको सिचुवान ड्रागन बोट टिमले २ सय र ५ सय मिटर दुवै विधामा उत्कृष्ट बन्दै ५ लाख ५० हजार रुपैयाँका दरले ११ लाख रुपैयाँ हात पारेको छ । त्यस्तै, प्रतियोगितामा नेपाली टिम ‘नारा ड्रागन बोट टिम’ले दोस्रो स्थान हात पार्न सफल भएको छ । २ सय र ५ सय मिटर दुवै विधामा दोस्रो स्थान बनाएका नेपाली टिमले उपाधिसँगै ३ लाख ५० हजार रुपैयाँका दरले ७ लाख रुपैयाँ हात पार्न सफल भएको छ । मैत्रीपूर्ण प्रतिस्पर्धामा चीनकै युनान ड्रागन बोट टिम तेस्रो भएको छ । दुवै विधामा तेस्रो युनानले प्रति विधा २ लाखका दरले ४ लाख रुपैयाँ हात पारेको छ । प्रतियोगितामा नेपाली टिम एनआरसीए उत्कृष्ट ४ मा पर्न सफल भएको थियो । त्यस्तै प्रतियोगितामा भाग लिएका ८ वटै टिमले जनही नगद १, १ लाख रुपैयाँदरले प्राप्त गरेका छन् ।
नेपाल र छिमेकी मित्रराष्ट्र चीनबीचको सांस्कृतिक तथा जनस्तरसम्मको सम्बन्ध सुमधुर बनाउने र पर्यटन प्रवर्द्धन गर्ने उद्देश्यले रेस तथा फेस्टिभलको आयोजना गरिएको थियो । नेपाललाई विश्वभर प्रवर्द्धन गर्न एवं यसबाट भविष्यमा अझै बढी चिनियाँ पाहुना ल्याउन सहयोग पुग्ने स्थानीयको भनाइ छ ।
ड्रागन बोट रेसलाई आगामि वर्षमा निरन्तरता दिने आयोजकले जनाएका छन् । त्यस्तै दक्षिण एसियामै पहिलो पटक आयोजना भएको बोट रेस फेस्टिभलमा झिलिमिली बोट, प्रतिस्पर्धी र दर्शकहरुले फेवातालको रौनक फेरिएको थियो । फेस्टिभलमा सहभागि नेपाली दशृकहरु लगायत चिनिया पाहुनाहरु सबै निकै उत्साहित देखिन्थ्य ।
