सडकको ट्राफिक व्यवस्थापन गर्न खटिएका प्रहरी आफ्नै दैनिकी हेरचाह गर्न नसक्दा गम्भीर रोगबाट पीडित हुन थालेका छन् । गण्डकी प्रदेशमा खटिएका ३६४ मध्ये अधिकांश प्रहरी मृगौला, श्वास–प्रश्वास तथा कानसम्बन्धी समस्याबाट पीडित हुन थालेका छन् । बाह्रदेखि चौध घन्टासम्म सिट्ठी बजाउँदै सडकमा उभिनुपर्दा स्वास्थ्यसम्बन्धी समस्या आउनु स्वाभाभिक हो । दिनभर धुवाँ र धुलोसँग मुकाबिला गर्नुपर्दा थुप्रै समस्याको सामना गर्नुपरेको गण्डकी प्रदेश ट्राफिक प्रहरी प्रमुख सुमनकुमार तिम्सिनाले बताए ।
विभिन्न प्रकारका रोगका साथै ट्राफिक प्रहरीलाई सवारीचालक तथा सडक यात्रुहरुले समेत हैरान बनाएका हुन्छन् । कतिपय चालकले गल्तीलाई ढाकछोप गर्दै त्यसबाट उम्कन निकै ठूलो शक्ति प्रदर्शन समेत गर्नेगर्दछन् । ट्राफिक प्रहरीका अनुसार ट्राफिक नियम उल्लङ्घन गर्नेमा सबैभन्दा बढी मोटरसाइकल चालक तथा यात्रु रहेका छन् ।
भौतिक तथा अति आवश्यक सुविधा नभएकाले पनि ट्राफिक प्रहरीमा समस्या देखिएको छ । कम जनशक्ति र चर्को ट्राफिक व्यवस्थापनले ट्राफिक प्रहरी बढी खटिनुपर्दा समयमा उपचार पाउन सकेका छैनन् । ट्राफिक प्रहरी प्रमुख सुमनकुमार तिम्सिनाले भने, “ट्राफिक प्रहरी कहाँ छ भनेर सबैले सोध्छन् तर ट्राफिक प्रहरीको समस्या के छ कसैले साध्दैनन्”माओवादी नेतृत्वको सरकारका पालमा तत्कालीन अर्थमन्त्री डा.बाबुराम भट्टराईले ट्राफिक कारबाहीबाट उठेको रकमको पच्चीस प्रतिशत ट्राफिक प्रहरीलाई नै दिने निर्णय गर्नुभएको थियो । तर त्यो निर्णय भने अहिलेसम्म कार्यन्यवन हुन सकेको छैन ।
