लगातारको वर्षा सँगै आइतबार राती हिमालपारिको जिल्ला मुस्ताङको काग खोलामा आएको बाढीले बाढीले ३१ वटा भौतिक संरचनामा क्षति पुगेको मुस्ताङ जिल्ला प्रहरी कार्यालयले जनाएको छ ।
क्षति भएको भवन तथा भौतिक संरचना, पशु चौपाया एवम् सवारी साधनको क्षति हेर्दा एक अर्ब हाराहारीको क्षति हुन सक्ने अनुमान गरिएको छ । लगातारको वर्षापछि वारागुङ मुक्ति क्षेत्र गाउँपालिका–२ उपल्लो झोङमा पहिरो जाँदा काग खोलामा आएको बाढीले गाउँपालिका–४ कागबेनीमा वडा कार्यालय, प्रहरी चौकी, धर्मशाला, स्कुल तथा सर्वसाधारणको घरमा क्षति पर्याएको हो ।
बाह्रगुङ मुक्ति क्षेत्र गाउँपालिका–१ मुक्तिनाथका वडा अध्यक्ष प्रमेश गुरुङका अनुसार माथिल्लो झोङ देखि आएको बाढीले माथिल्लो क्षेत्रमा क्षति नपुर्याएको भए पनि कागबेनीमा क्षति पुगेको बताए ।
काग खोलामा आएको बाढीले बिजुलीको पोल बगाउँदा उक्त क्षेत्रमा विद्युत् अवरुद्ध भएको छ । कागबेनीमा बिजुलीको पोल ढल्दा उपल्लो मुस्ताङको लोमान्थाङ एवम् लो–घेकर दामोदर कुण्ड गाउँपालिका अन्धकार बनेको मुस्ताङमा विद्युत् वितरण गर्दै आएको स्थानीय बताउछन् ।
मुस्ताङका प्रमुख जिल्ला अधिकारी अनुप केसीका अनुसार काग खोलामा आएको बाढीले कागबेनीको श्राद्ध स्थलमा रहेको एउटा धर्मशाला बगाएको छ । जनशान्ति माध्यमिक विद्यालयको खेलमैदान पुरिएको छ भने दुई तले विद्यालयको पहिलो तला पनि लेदोले पुरेको छ । १५ घर पूर्ण रूपमा बगाउनुका साथै अन्य १५ घरमा पनि क्षति पुगेको स्थानीयले बताएको प्रजिअ केसीले बताए । उपल्लो मुस्ताङ हुँदै चीन जोड्ने बेनी–जोमसोम–कोरला सडक खण्ड अन्तरगतको कागबेनीमा रहेको काग खोलाको पक्की पुलका साथै काठको पुल समेत बाढीले बगाएको छ ।
जिल्ला प्रहरी कार्यालय मुस्ताङका प्रहरी नायव उपरीक्षक(डिएसपी) रवीन्द्र पौडेलका अनुसार प्रहरी चौकीको मोटर साइकल सहित कागबेनी क्षेत्रका १० वटा सवारी साधनमा क्षति पुगेको भनिएको भए पनि एकिन गर्न बाँकी छ ।
रातको समयमा एक्कासि बाढी आएको भए पनि स्थानीय तथा सुरक्षाकर्मीहरूले उद्धारको काम गर्नुभएको मुस्ताङका प्रजिअ केसीले बताए । कागबेनी प्रहरी चौकीको भवन रहेको हतियार सुरक्षित रहेको भए पनि अन्य सामग्री तथा भवन भने बाढीले पूर्ण क्षति भएको छ ।
बेनी–जोमसोम–कोरला सडक खण्ड अन्तरगत मुस्ताङको बाह्रगुङ मुक्ति क्षेत्र गाउँपालिकाको पान्डा खोला, घरपझोङ गाउँपालिकाको मार्फा स्थित राज खोलामा बाढीले गर्दा सडक अवरुद्ध हुँदा सदरमुकाम जोमसोम यातायात सम्पर्क विच्छेद भएको छ । मुस्ताङका प्रमुख जिल्ला अधिकारी अनुप केसी सहित नेपाली सेना, नेपाल प्रहरी, सशस्त्र प्रहरी एवम् राष्ट्रिय अनुसन्धानको टोली पनि घटनास्थल पुगेर उद्धारको कार्यमा खटिएका छन् ।
