५ दशकदेखि अधुरै रहेको पोखरा बसपार्क आफ्नै कार्यकालमा बनाइसक्ने मेयर धनराज आचार्यले बताएका छन् । आइतबार पृथ्वीचोकको पोखरा भवनको शिलान्यस गर्दै मेयर आचार्यले उक्त प्रतिवद्धता जनाएका हुन् । नेपालको प्रमुख पर्यटकीय सहरकोे रुपमा दरिएकोे महानगरको बसपार्कको स्थिति बिजोग हुँदा आलोचना हुँदै आएको थियो । स्थलमार्ग भएर पोखरा आउने पर्यटकले बसपार्क गतिलो नभएको भन्दै गुनासो गर्दैै आएका थिए ।
पोखरा बसपार्क बनाउन २०३२ सालमै जग्गा अधिग्रहण सुरु भएको थियो । तत्कालीन नगर विकास समितिले बसपार्क बनाउन भन्दै २०५ रोपनी जग्गा अधिग्रहण गरेको थियो । जसमा बसपार्कको बीच भागमा पर्ने पृथ्वीराजमार्ग छुट्याएर १८७ रोपनी जग्गा बसपार्कको नाममा कायम गरिएको थियो ।
तर, ५ दशकअवधिसम्म नबनेको पोखरा बसपार्क बर्सेनि अतिक्रमणको चपेटामा पर्दा मुस्किलले ४७ रोपनीमा सीमित हुन पुगेको छ । मेयर आचार्यले अहिले बसपार्कलाई व्यवस्थित गर्ने र त्यहाँ रहेका सुकुम्बासी बस्तीलाई पनि व्यवस्थापन गर्ने अन्तिम चरणमा पुगेको दाबी गरे ।
