पोखरा महानगरपालिका १८ खपौदीस्थित हर्पन खोलामा पौडी खेल्ने क्रममा डुबेर बेपत्ता एक बालकको शव भेटिएको छ । सशस्त्र प्रहरीको गोताखोर टोलीले करिब एक घण्टासम्म खोजेर शव निकालेको हो । पोखरा महानगरपालिका– ५ मालेपाटन बस्ने अन्दाजी १४÷१५ वर्षका सोनम सुवेदी आइतबार दिउँसो पौडी खेल्ने क्रममा खोलामा डुबेर बेपत्ता भएका थिए । सुवेदी बेपत्ता भएपछि उनीसँगै पौडी खेल्न गएका अर्का बालकले स्थानीयमार्फत सशस्त्र प्रहरीलाई जानकारी गराएका थिए ।
दिउँसो साढे १ मा बालक डुबेको खबर पाउनसाथ सशस्त्र प्रहरी बल नेपाल नं.२४ कालिका गण कास्कीबाट परिचालन भएको विशेष विपद् उद्धार एवं गोताखोर टोलीले साढे २ बजेतिर शव निकालेको हो । बालकको शव पोष्टमाटमको लागि पश्चिम क्षेत्रीय अस्पताल पठाइएको जिल्ला प्रहरी कास्कीका प्रहरी नायव उपरिक्षक बसन्त कुमार थापाले बताए ।