सिन्धुपाल्चोक जिल्लाका तीन नगर र नौ गाउँपालिकामध्ये त्रिपुरासुन्दरी र सुनकोसी गाउँपालिकाले आफ्नै स्थानीय पाठ्यक्रम तयार गरेर गाउँपालिकाभरका विद्यालयमा सञ्चालनमा ल्याएका छन् ।
जनप्रतिनिधि, शिक्षा अधिकारी, विज्ञ, शिक्षकसहितको पाठ्यक्रम निर्धारण समितिद्वारा बनाइएको पाठ्यपुस्तक दुई स्थानीय तहभर कक्षा १ देखि ८ मा पढाउन सुरु गरिएको छ । त्रिपुरासुन्दरी गाउँपालिकाका शिक्षा अधिकृत शालिग्राम घिमिरेका अनुसार स्थानीय पहिरन, भौगोलिक, सामाजिक, आर्थिक र सांस्कृतिक सम्पदाको विषय समेटेर त्रिपुरासुन्दरीको स्थानीय पाठ्यक्रम तयार पारिएको छ ।
कक्षा १ देखि ८ सम्म लागू हुने गरी एक कक्षामा एक विषय स्थानीय पाठ्यक्रम समावेश गरिएको छ । विद्यार्थीले पालिकाको भूगोल, सामाजिक अवस्था, पर्यटकीय स्थलको सामान्य ज्ञान राखून् भनेर आफ्नै पाठ्यक्रम तयार गरिएको र त्रिपुरासुन्दरी गाउँपालिकाको ३० वटा विद्यालयभर लागू गरेर सञ्चालनमा ल्याइएको गाउँपालिकाले जनाएको छ । स्थानीय सरकारले आफ्नो क्षेत्रमा रहेका सम्भावना, स्रोत तथा भूगोलबारे पाठ्यपुस्तक तयार गर्ने संवैधानिक र स्थानीय सरकार सञ्चालन ऐन, २०७४ अनुरुप व्यवस्था छ । विद्यार्थीलाई आफ्नो भूगोल, संस्कृति, रितिरिवाजका विषयमा थाहै नभई उच्च शिक्षा अध्यापनमा पुग्ने र स्थानीय संस्कृतिबारे बेखबर हुने जोखिम टर्ने त्रिपुरासुन्दरी गाउँपालिका अध्यक्ष भक्तध्वज बोहोराले बताए ।
पाठ्यक्रममा कक्षागत सिकाइ उपलब्धि, विषय क्षेत्रगत कार्यसमय, विषयवस्तुको विस्तृतीकरण सहज सिकाइका प्रक्रिया, विद्यार्थी मूल्यांकनजस्ता विषयवस्तु छन् । त्यसैगरी सुनकोसी गाउँपालिकाले धार्मिक, सांस्कृतिक सम्पदा, प्राकृतिक स्रोत, कृषिदेखि आधुनिक संरचना समेटेर बनाइएको ‘हाम्रो सुनकोसी’ नामक पाठ्यक्रम शैक्षिक सत्र ८०÷८१ देखि लागू हुने सुनकोसी गाउँपालिका अध्यक्ष टपिन्द्रप्रसाद तिमिल्सनाले बताए । ‘गाउँपालिकाले बाघभैरव माविका प्रध्यानध्यापक विष्णुप्रसाद न्यौपानेको संयोजकत्वमा ६ सदस्यीय स्थानीय पाठ्यक्रम निर्माण कार्यदल गठन गरेको थियो, कार्यदलले दुई महिना खटेर विज्ञ ,सम्बन्धित स्थानीय स्रोतसँग सुझाव लिएर स्थानीय पाठ्यक्रम तयार गरेको छ,’ तिमिल्सनाले भने । स्थानीय पाठ्यक्रममा गाउँपालिकाको परिचय, संस्कृति संस्कार, प्राकृतिक सम्पदा, मानव निर्मित संरचना, उद्योगजस्ता सम्पूर्ण नौ विषयवस्तु समावेश गरिएको उनले बताएका छन् । यसअघि पाँचपोखरी थाङपाल गाउँपालिकाले ८ लाख रुपैयाँ खर्चेर बनाएको स्थानीय पाठ्यक्रममा आधारित पुस्तक गाउँपालिकाभरका २६ सामुदायिक विधालयमा अनिवार्य गरिसकेको छ ।
