पोखरा, १५ माघ । फूलबारी फाउण्डेसन नेपाल पोखराको समन्वय सहयोग र वारागुङ मुक्तिक्षेत्र गाँउपालिका मुस्ताङको आयोजनामा बालबिकास सहजकर्ताहरुको २ हप्ते मन्टेसरी शिक्षक तालिम सम्पन्न भएको छ । पोखरा महानगरपालिका वडा नं ३ नदीपुरस्थित फूलबारी मन्टेसरी ट्रेनिङ इन्स्टिच्यूटमा मिति २०८० माघ २ गते देखि १५ गतेसम्म गाँउपालिका अन्तर्गतका १२ वटा इसिडि केन्द्रहरुमा कार्यरत १४ जना बालबिकास सहजकर्ताहरुलाई मन्टेसरी बिधिमा आधारित बालबिकास तालिम प्रदान गरिएको थियो । तालिम अबधिमा गाँउपालिकाका अध्यक्ष रिङजिन नामगेल गुरुङ र उपाध्यक्ष ढिकि गुरुङले निरिक्षण भ्रमण गर्नुभएको थियो । अध्यक्ष गुरुङले तालिममा सिकेका कुराहरुलाई कक्षा कोठामा लागु गर्न निर्देशन दिनु भयो र गाँउपालिकाकाले इसिडि केन्द्रहरुलाई सक्दो सहयोग गर्ने बाचा पनि गर्नुभयो । साथै यस किसिमको तालिम प्रदान गर्न सहयोग गर्नु भएकोमा फूलबारी फाउण्डेसन नेपालका अध्यक्ष एवं फूलबारी मन्टेसरी कटेजका प्रिन्सिपल अरुना शेरचन प्रति आभार प्रकट गर्दै धन्यबाद दिनु भयो ।
तालिमको अन्तिम दिन समापन सेसनमा फूलबारी फाउण्डेसन नेपालका अध्यक्ष अरुना शरेचनले प्रशिक्षार्थीहरुलाई तालिममा सिकेका कुराहरुलाई कक्षा कोठामा लागुगर्न आग्रह गर्नु भयो । प्रशिक्षार्थीहरुको तर्फबाट सहजकर्ता डोल्मा बिकले यस्तो खालको प्रभावकारी तालिम लिन पाएकोमा खुशी ब्यक्त गर्दै वारागुङ मुक्तिक्षेत्र गाउँपालिका, फूलबारी फाउण्डेसन नेपाल र सम्पूर्ण प्रशिक्षकहरुलाई धन्यबाद दिनुका सथै आफूहरुले सिकेका कुराहरुलाई लागु गर्ने प्रतिबद्धता व्यक्त गर्नु भयो । फाउण्डेसनका बोर्ड सदस्य एवं न्यू ग्यालेक्सी बोर्डिङ स्कुलका भाइस प्रिन्सिपल राजेश भण्डारी र पाइला नेपालका प्रजु गुरुङले पनि तालिम सम्बन्धि आफ्नो अनुभवबारे बोल्नु भएको थियो ।