चैते दशैँको अवसरमा बागलुङ कालिका मन्दिरमा भक्तजनको घुइँचो लागेको छ । बिहानै चार बजेदेखिनै कालिकामा पूजाअर्चना गर्ने नेपाली तथा भारतीय पर्यटकको घुइँचो लागेको हो । हरेक वर्ष बागलुङमा चैते दसैँलाई भव्य रुपमा बनाउने गरिन्छ । हरेक वर्ष चैते दसैँका बेला एकै दिन हजारौँ दर्शनार्थीले कालिकाको दर्शन गर्ने गर्छन् । तिर्थालुको घुइँचो बढेपछि बागलुङ भगवती गुठी व्यवस्थापन समितिले सुरक्षाकर्मी परिचालन गरेर पूजाआजा गर्ने व्यवस्था मिलाएको छ । चैतको नवरात्रमा बागलुङ कालिकाको पूजा गर्दा र बलि दिइँदा मनोकांक्षा पूरा हुने जनविश्वास छ । धौलागिरी क्षेत्रकै ठूलो शक्तिपीठका रुपमा रहेका हुँदा मन्दिरमा चैते दसैँ बेला हजारौँ भक्तजन आउने भगवती गुठी व्यवस्थापन समितिका अध्यक्ष कुमार खड्काले बताए । नवरात्र सुरु भएदेखिनै दैनिक हजारौँ भक्तजन आएको उनको भनाइ छ । यो अवसरमा करिब पाँच लाख धार्मिक पर्यटक बागलुङ भित्रिने अपेक्षा गरेको अध्यक्ष खड्काले बताए ।
मन्दिरमा बोका, राँगो, कुखुरालगायतको बलि चढाइनाका साथै शान्तिको प्रतीक परेवा उडाउने गरिन्छ । चैतेदसैँका अवसरमा लाग्ने तीन सय वर्ष पुरानो मेला पनि चैत ३० गतेदेखि सुरु भएको थियो । मेला वैशाख ६ गतेसम्म सञ्चालन हुने उनले जानकारी दिए । चैते दसैँका अवसरमा खुला राष्ट्रिय लोकदोहरी प्रतियोगिता, खुला राष्ट्रिय भलिबल लगायतका प्रतियोगितात्मक र सांस्कृतिक कार्यक्रम आयोजना गरिएको छ ।
